अवसेची छाया I होती जन्मांतरी
झाला तू कैवारी I तेंव्हा देवा II१II
प्रपंचाची वीट I तूचि केली नीट
तरी नाही धीट I मन देवा II२II
तूचि दिले देवा I कर्म अर्थ दाम
आणि तुझे नाम I पामरासी II३II
पायरीसी राहू I की शिखरास जाऊ
सांगा कुठे पाहू I विठु राया II४II
ऐलतिर मोह I पैलतिर माया
मधोमध काया I फसली गा II५II
पुन्हा कुरु क्षेत्री I दाव तुझे रुप
देहाचाच धूप I अर्पितो मी II६II
पडू द्या हो कानी I पांचजन्य घोष
मिटो सारा दोष I समूळची II७II
कष्टाचेच हाथ I कर्माचीच ओढ
आणि तुझे वेड I असू द्यावे II८II
ब्रम्हा पुजारी
१६ फेब्रुवारी २०२०
No comments:
Post a Comment