बांधावरचा द्वेष नको
मज हिरवेगार शेत हवे
तंटा नको अन् तोटा नको
मज माणुसकीचा न्याय हवा
बळी राजाचा बळी नको
मज बळी राजाचे राज्य हवे
सुजलाम् सुफलाम् जननी हवी
मज धडधाकट नव राष्ट्र हवे
फास नको गळफास नको
जगण्याची नीत आस हवी
कथा नको अन् व्यथा नको
घामाचे मज मूल्य हवे
लेक लाडकी तुमची आमुची
भ्रूणहत्येचे मज पाप नको
अद्न्यानाची रास नको
मज द्न्यानाची आरास हवी
भार नको आभार नको
जनकल्याणाचे सार हवे
अंधाऱ्या गावात मला
लखलखत्या दिव्यांचे गीत हवे
खिलाराची मज जोड हवी
मज लेकुरवाळी गाय हवी
दुधाचा मज महापूर हवा
चेहऱ्यावर सारा नूर हवा
पैसे नको मज पाणी हवे
भीक नको मज पीक हवे
धरणात हरविलेले गाव हवे
मज कर्जात गेलेले शेत हवे
धानास माझ्या भाव हवा
दरबारी तुमच्या मज मान हवा
स्वातंत्र्याच्या सत्तरीत तरी
मज सुराज्याचा नव सूर्य हवा !!!
ब्रम्हा पुजारी
०२.०५.२०१७
No comments:
Post a Comment